María Esther García López
La Degol.lada (Valdés). Llicenciada en Pedagoxía y Esperta en Filoloxía Asturiana, ye miembru de l’Academia de la Llingua Asturiana. Tien publicaos dellos llibros de didáctica ya investigación etnográfica ya histórica. Ye autora de gran númberu de títulos de narrativa y de poesía y de lliteratura infantil. La so obra forma parte de numberoses antoloxíes.
Tien nel so haber dellos premios lliterarios tantu de poesía como de narrativa y otros galardones como’l Premiu Timón a la trayectoria lliteraria de l’Asociación Cultural l’Arribada. Foi Poeta del Alba n’Alborada de Candás.
Ye collaboradora habitual de La Nueva España y de destacaes revistes lliteraries y d’investigación. Dirixe l’espaciu “Mestura Cultural” na cadena SER.
Los sos poemes fueron musicalizados por dellos compositores: Ernesto Paredano, Joaquín Pixán, Ana Vázquez Silva y Jesús Gavito.
Actualmente ye la presidenta de l’Asociación d’Escritores d’Asturies
Entrevista
- Crees que los escritores debiéremos tar xuníos en dalgún tipu d’ asociación?
Los escritores creamos en solitariu, y por eso, el tener contautu con otros collacios, conocenos un poco más, intercambiar les nueses creaciones y venos de xemes en cuando ye dalgo que considero positivu pal nuesu oficiu d’escribir. Paezme perimportante que los escritores tengamos representación dende les asociaciones, tanto ante l’alministración, como en tolos foros onde ta presente la lliteratura. Que tengamos contautu, que dispongamos d’información que nun nos llegaría en solitariu y que participemos de manera activa nes actividaes organizaes. Cada día faise más necesario reivindicar los nuesos derechos, velar pola visibilidá de les nueses obres, conocer el camín que lleven les publicaciones una vez que salen a la lluz y sobre too porque caminar en xunto siempre nos da ánimu pa siguir y p’arriquecenos coles aportaciones de los demás.
Cómo ves el panorama lliterariu n’España?
Si falamos del númberu de publicaciones, paezme que se publica más que nunca. Hasta hai unos años yeren les editoriales les que determinaben qué y a quién publicar. Güei les coses cambiaron, hai muncha facilidá pa poder publicar un llibru, munches editoriales tienen autoedición y edición a demanda. Con esto nun quiero dicir que l’autoedición tenga menos calidá. Qu’una editorial apueste por una publicación o d’otra manera la pague l’autor, son varios los aspeutos qu’entran en xuegu, ente ellos l’ económicu. Da pa falar.
D’otramiente, los llectores tienen muncho pa poder escoyer y de xuru que se quedarán cola lliteratura que –yos llegue, que-yos preste. Sicasí, paezme que tamos ante un panorama lliterariu mui cambiante; vamos hacia lo breve, lo minimalista, como n’otres estayes del arte. A la hora d’escoyer el soporte, a la mocedá présta-y lo dixital, lleen nos e-books, en blogs y nes redes sociales. Tamién pienso que convivirán los llibros en soporte papel y dixital. Creo que lo importante ye formar a los neños y neñes y a la mocedá pa que seyan bonos llectores; llectores críticos y preparalos pa que d’adultos sepan escoyer y consumir bona lliteratura.
3.¿Y n’Asturies?
Opino que n’Asturies tamos a l’altura de les otres llingües del Estáu no tocante a la producción y calidá lliteraria. Tenemos perbonos creadores y creadoras tanto en castellán, como n’asturianu. Lo que nos fai falta ye’l sofitu de l’Alministración del Principáu, y de les instituciones y persones que de dalguna manera puen ayudar a esparder la lliteratura que se fai n’Asturies. Ye perimportante dar visibilidá a les nueses obres y a los y les escritores nos distintos foros onde los llibros tienen protagonismu: llibreríes, biblioteques, clubes de llectura, feries del llibru, centros educativos, medios de comunicación… Y per otru llau, cuesta muncho trespasar les llendes y ser conocíos fuera del entornu d’Asturies. Necesitamos que se nos valore más y que los medios de comunicación dean publicidá, de contino, a la lliteratura fecha n’Asturies, y non solo como dalgo puntual o en feches determinaes.
- Qué midíes deberíen tomar les autoridaes p’afalar a la llectura?
- Lo primero, que la obra de los escritores d’Asturies tea presente en toles biblioteques públiques. Dotar de presupuestu específicu a los centros educativos y biblioteques pa que merquen obres d’autores asturianos, aparte d’autores d’otres lliteratures.
- Organizar actividaes, xuntes, xornaes, seminarios, talleres…, qu’espardan les obres de los escritores d’Asturies en tolos xéneros.
- Sofitar a los medios de comunicación por publicitar les obres d’autores asturianos.
- Facer campañes publicitaries en feches señalaes pa esparder la lliteratura que se fai n’Asturies.
- Nos clubes de llectura, dar a conocer autores asturianos.
- Fomentar la visibilidá de les muyeres escritores. Inda tamos n’inferioridá de condiciones respeuto a los homes, tanto en visibilidá como en reconocencia.
5.- Recomiéndanos dalgún llibru tuyu.
Poemariu: El color de los días. (2019). Castellán. Bajamar Editores.
El color de los días. Asturianu. E. Setentayocho.
Infantil: La bruja en la Biblioteca.(2019) E. Tinta Chica.
A veces el amor es azul. (2020) Colección Satiria. E. Setentayocho.
- ¿Cómo definiríes la to lliteratura?
Ye difícil definime a mi mesma. Dicir qu’hai muncho de mi na mio lliteratura. Ye difícil desprendese de les vivencies, de les esmoliciones, del pasu pola vida. Los qu’escribimos vamos dexando’l resclavu de lo vivío. Y cuando digo lo vivío, refiérome a les esperiencies propies y a lo observao al nueso alredor, comportamientos, acontecimientos y esperiencies ayenes; tamién otres influencies. La mio lliteratura ye la xeografía del mio ser en rellación colos acontecimientos que me fueron marcando a lo llargo’l tiempu, el contautu coles persones de distinta triba, la mio profesión, los viaxes, les llectures y el llugar onde nací y me crié. Too ello axeitao con una bona dosis de ficción, de maxa, de mentires, de verdaes, d’esmoliciones y enfotos. Y a la vez col oxetivu de dir dexando resclavu de belleza.
Por Armando Murias Ibias
