Por David Fueyo
La escritura, n’ocasiones, ye un viaxe que nun se mide en kilómetros, sinón n’alcuentros, nes voces que resonen na memoria y nes hestories que nos acompañen inclusive antes de ser cuntaes. Gonzalo Llamedo Pandiella ye un escritor que fae del llinguaxe’l so llar y de la palabra, la so ferramienta d’esploración. Con tol futuru per delantre y una trayectoria que transita ente la docencia, la crítica y la creación lliteraria, la so voz nútrese tanto de la emoción sincera como de la reflexón académica. Nesta entrevista pa Tinta baxo les uñes, enfusamos nel so universu, onde la lliteratura nun ye solo un oficiu, sinón una forma de mirar el mundu y d’habitalo.
¿Qué tendríamos que saber de ti que nun tenga nada que ver cola lliteratura?
Amás de la escritura, otra de les esperiencies que me dan la vida y que me tresformaron son los viaxes y, sobre manera, les persones que tuvi la suerte de conocer nes estancies más llargues nel estranxeru.
¿Cómo y cuándo supisti que te gustaría dedicate a escribir?
La escritura gústame dende neñu y vien acompañándome nel planu personal nes distintes etapes de la vida. Poder dedicame a escribir sedría un privilexu, pero nun ye una realidá nin pienso tampoco que pueda tener eses aspiraciones. Sicasí, sé que la escritura va ser siempre una compañera de vida, anque nesti periodu nun tenga cuasi protagonismu por mor de la dedicación intensiva al trabayu.
¿Cómo definiríes la to voz lliteraria? ¿Crees que camudó enforma desque empezasti a escribir?
Camiento que ye una voz mui sincera porque suelo escribir dende’l sentimientu y eso implica manifiestar pensamientos, contar esperiencies y compartir emociones personales ensin demasiaes torgues. Espero seguir fiel a esta manera de ver la escritura, pero sí voi deprendiendo y tratando d’ameyorar otres coses.
¿Qué hestoria lleves tiempu queriendo cuntar, pero entá non te atrevisti a escribir?
Conocí en pocos años a munches persones que me marcaron de manera significativa y a les que me gustaría poder dedica-yos unes llinies. Ye dalgo que tengo na cabeza.
Si tuvieres qu’encamentar trés obres clave de la lliteratura pa los llectores de LITERARiAS, ¿cuáles escoyeríes y por qué?
Nun soi mui fanáticu de la canonización. Llevo dellos años trabayando con una asignatura de lliteratures minorizaes que fala de la cantidá de voces que quedaron silenciaes o subordinaes a espaldes de los cánones reduccionistes que nos falen de delles obres clave. Sé que la seleición pue ser inevitable ya inclusive útil en munchos sentíos, pero confío tamién nel placer del descubrimientu personal y nel valor de les voces “pequeñes”.
¿Qué obra yá publicada por otru escritor o escritora te gustaría que fuere de la to autoría?
Yo nun-y quitaría una obra a nengún autor. Nel momentu nel que dexare de pertenecer a esa persona, dexaría de ser como ye y probablemente yá nun me gustaría.
Piensa en ti como escritor dientro de diez años, ¿cómo te ves n’esi non tan alloñáu dos mil trenta y cinco?
Espero daveres dende va años tener una situación profesional más estable que me permita equilibrar esa parte de la vida coles demás, pa devolve-y a la escritura’l llugar y l’atención personal que merez. Acumulo idees, pero nun tengo la paz necesaria pa sentame a da-yos forma. De toes maneres, pienso que pa ser escritor nun ye preciso tar constantemente escribiendo o publicando. Creo que ye una actividá que tien muncho de cognitivo: pa min ye cuasi un estáu mental porque l’espíritu d’escritor inflúi na manera de percibir el mundu, de movete nél y de valorar les coses.
Si pudieres inventar una ferramienta lliteraria imposible, ¿qué maravía apurriríes al oficiu d’escribir?
Dalgo asina como “cartes del Más allá”: que nos pudiéremos cartiar coles persones queríes que yá nun tán. Sé que suena creepy, pero de lo emotivo d’eses comunicaciones escrites saldría tamién lo lliterario.
¿Qué esperes apurrir como miembru/a de l’Asociación d’Escritores d’Asturies?
Nesti periodu, como miembru, participo en dellos recitales y trato de mandar escritos pequeños pa actividaes grupales. Tamién aprendo del contautu con otres/os compañeres/os que voi conociendo gracies a l’Asociación. D’otra banda, como parte de la xunta direutiva, intento dar un sofitu a l’AEA en cuestiones más organizatives, como les caberes xornaes lliteraries de Pravia. Pa esti 2025 comprometíme a siguir collaborando nesta llinia na midida de lo posible.
Curtiu currículum lliterariu:
Gonzalo Llamedo Pandiella (Nava, 1990) ye Profesor de Filoloxía Románica na Universidá d’Uviéu y vicesecretariu de l’Asociación d’Escritores d’Asturies. Dende’l 2021, collabora col Gobiernu del Principáu d’Asturies como xuráu nos premios lliterarios que convoca la Conseyería de Cultura, Política Llingüística y Deporte. Tamién tien collaboraciones como autor nes revistes Lliteratura (númberos 36 a 40) y Formientu (númberos 18 a 20), nes estayes de Poesía, Narrativa, Ensayu y Crítica lliteraria. Como escritor en llingua asturiana, nel 2022 ganó’l El XXVIII Premiu de Poesía Fernán Coronas, col poemariu Los fíos de Bauman. Nel 2019 ganó’l «II Concursu de Microrrellatos Luisa Rebollar» del Ayuntamientu de Sariegu y quedó finalista nel «VI Concursu de Microrrellatos La Voz del Barrio» de la Biblioteca Popular “Santiago” de Xixón. Nel 2020, ganó’l «I Concursu #AndanciuLliterariu» d’Iniciativa pol Asturianu y el «V Concursu de Microrrellatos Entaína a escribir», entamáu pol Gobiernu del Principáu d’Asturies y l’Institutu Asturianu de la Mocedá, quedando tamién finalista con un rellatu n’asturianu nel «Concurso de relatos breves “BUO”» de la Universidá d’Uviéu. Nel 2021, llevó’l tercer premiu del «VI Concursu de Microrrellatos Entaína a escribir».
