Al rodiu del ganáu y la quintana
Alredor de la quintana: animales y otros bichos
Esther García López
Dende otres dómines, el ser humanu tuvo una rellación mui averada col restu los animales, una rellación de respetu, como asina quedó grabada nel fondu de les cueves prehistóriques. El pasu del tiempu nun camudó esta rellación, como lo amuesen los pueblos qu’escoyieron pal so escudu dalgún d’estos animales: el caballu, el lleón, l’águila con una o dos cabeces, el cuervu o el carneru.
Esti llibru, prollogáu pol periodista Vicente Montes, ta formáu por 17 artículos espublizaos en La Nueva Quintana, que selmanalmente editó’l periódicu La Nueva España nos años 2009 y 2010.
El títulu dexa perclaru‘l so conteníu: Alredor de la quintana: animales y otros bichos. Na quintana vive la familia llariega y nel llugar más afayadizu ta’l ganáu, sustentu pa l’alimentación diaria. Toos tan nomaos (burru, perru, vaca, gochu, oveya, pita, gatu y l’abeya). D’otra miente, tamién tienen sitiu los bichos más o menos dañinos (l’araña, el llobu, les andolines, la raposa, los ratos, la culiebra, el curquiellu, sapos, ranes, sapagueres, viérbenes, rates y otros cocos). Son l’universu animal de la quintana, la compaña que caltiene la familia. Pa ellos viven y ellos dan-y la vida.
Al rodiu de munchos praceres y dalgunos mieos, l’autora (Esther García López) fai alcordanza dellos animales con anéudotes reales e imaxinaries que nun pueden escaecese porque algamen el nuesu maxín de l’aldea asturiana. Amás, l’autora mete al leutor ente’l ganáu cuando nos cuenta coses de la vaca, del perru, ante la presencia del llobu, cuando asítianos sobre topónimos qu’ella conoz como la palma les manes.
Nótase abondo que l’autora vivió ente los animales que noma nel llibru porque los cancios de les andolines nos alambres de la lluz lleguen nidios a les nuestres oreyes, igual que gulismamos l’averamientu de la raposa al corral. Y muncho más.
Armando Murias ye escritor y presidente de l’Asociación d’Escritores d’Asturies.
