“Dende mui nuevu, la mio gran ambición foi convertime n’escritor. Mas concretamente, en novelista… De sópetu fui consciente de que nunca nun quixi realmente inventar nada: yo quería –aínda quiero- narrar les esperiencies de xente de carne y güeso, de persones a les que yo mesmu conociera, contar les vides qu’eses persones tuvieren vivío na realidá y non sólo na mio cabeza…”
Con esta curiosa confesión de Martín, personaxe narrardor de la novela y auténticu alter ego del autor, entama l’últimu llibru de Xandru Fernández “LA BANDA SONORA DEL PARAÍSU”, editáu por Trabe.
Esti entamu va ponenos na pista de cuáles son los braeros finxos ente los que se va desarrollar la novela, asina como los oxetivos que l’autor marca nidiamente. Y ye que Xandru Fernández, a la manera de Stendhal, carreta ´l so gran espeyu lliterariu polos valles mineros de Turón, pola realidá que foi –y sigue siendo- l’Asturies de fin de sieglu pasáu, pa enseñanos el día a día d’una sociedá estrapayada pol desmantelamientu industrial, por la perda d’un mou de vida a la que se pensaba indisolublemente xunida.
Pa llograr esti efectu “visualizador”, Xandro Fernández echa manu d’unos personaxes de “carne y güesu” –como él diz nel entamu- dibuxaos cola fuerza y precisión a la que yá nos tenía avezaos n’obres como “Les Ruines” o “Los homes de bronce”, y qu’agora, en “La Banda Sonora del Paraíso”, van representar una historia que se mueve ente dos planos temporales (seique hasta morales) y que, sólo al final del llibru, acaben por amestase y dar sentíu a tola obra. Nun d’esos planos atópase ‘l narrador , Martín, col so enfotu por descubrir una historia qu’escribir; nel otru, Fidel, auténticu protagonista del llibru, carretando una vida, delles veces un tanto rocambolesca, que nun va llegar a ningún puertu porque lo importante nesti llibru nun ye lo que-yos pasa a los personaxes, sinon el trasfondu pol que se mueven.
La crisis industrial, los chamizos mineros, la droga… fain que los personaxes de la novela dean vueltes como cegaratos a la gueta d’una salida que nun van algamar porque, probablemente, nun esiste na realidá, y nun será l’autor quien la enmazcare piadosamente como dexa bien claro na páxina 189, en boca d’una de les protagonistes: el so deseu de nun fracasar “nel enfotu de da-y voz a una xeneración como la nuesa, criada en barrios como ‘l nuesu, fuera en Seattle o n’Asturies”
Diz Milan Kundera: “Una novela nun ye una confesión del autor sinon una investigación de lo que ye la vida humana dientro la falcatrúa na que se convirtió´l mundu”. Y tamién: “El novelista nun ye un historiador nin un profeta, ye un esplorador d’una esistencia al rodiu de los personaxes imaxinarios”. Palabres éstes que Xandru Fernández, seique, podría firmar ensin ningún tipo de rocea, pues definen a la perfección la so manera d’enfocar el so trabayu lliterariu. Ye al través de personaxes como Fidel, Martín, Aladino o Mori, al traves del so aliendu, de les sos frustraciones y suaños, como se fai más prósima y entendible una realidá social que, d’otra miente, sería más difícil de capiscar; y, en tanto qu’entendible, más fácil de cambiar y transformar.
Xandro Fernández sabe esto y nun ye inocente nel so planteamientu de la novela. Quiciás porque él, nel fondu, ye un revolucionariu nel sentíu más románticu de la palabra, si ye qu’atendemos a otru de los personaxes: “Soi consciente que la única manera de someter al mundu, d’ordenalu, ye narralu, convertilo n’historia”.
Habría qu’avisar qu’ en “La Banda Sonora del Paraísu” el viaxe que nos propón l’autor pol valle de Turón –arquetipo de cualesquier zona con grave esfarrape industrial- ye una cafiante travesía –nun podía ser d’ota forma- por un mundu grís, d’agua y mugor, con personaxes que falen con naturalidá, nun reñida cola bayura llingüística a la que nos tien avezaos l’autor; anque, delles veces, la repetición d’algunos términos acaben por rinchar na llingüa.
Por otru llau, les contínues referencies históriques (como la llegada del home a la lluna por vez primera, la guerra de Chipas, etc) y les musicales centren la obra nun tiempo que nos queda mui cerquina, nunos fechos que conformaron una época y que tovía siguen condicionando ´l nuesu presente y que, como novelista-notariu que ye Xandru Fernández de la sociedá que-y tocó vivir, fará que dientru munchos años cualesquier llector algame una idea clara de lo que fuimos y lo que dexamos de ser nesti cachín del mundo.
“La Banda Sonora del Paraíso” ye, ensin duda, un pasu más na carrera lliteraria de Xandru Fernández, nel so particular ya inconfundible mundu criador, que lu sigue manteniendo dientro esi garrapiellín de bonos narradores n’asturianu –desgraciadamente non muchos; pueden contase colos deos d’una manu-, y que nos fai aprender y esfrutar colos sos llibros y non azotalos contra la paré, como pasa con otres munches noveles que güei en día se publiquen.
