L’Asociación d’Escritores d’Asturies creóse n’Uviéu’ldía 5 de xunetu del añu 2000 por iniciativa de los escritores que vienen darréu:
Ricardo Álvarez Labra, Mariano Arias Páramo, Juanjo Barral Álvarez, Saúl Fernández García, Fernando Fonseca Díaz, Javier Lasheras Mayo, Pepe Monteserín Corrales, Jorge Ordaz Gargallo, Tino Pertierra Álvarez, Rubén Darío Rodríguez Calvillo y Manuel Villarroel Labra.
Más tarde, el 11 de xunetu, solicitóse la inscripción de l’asociación y el 2 d’agostu de 2000 resolvióse la inscripción de la entidá col númberu 6.262 de la Sección Primera del Rexistru d’Asociaciones del Principáu d’Asturies. Darréu, el 25 de payares del 2000 celebróse l’Asamblea Constituyente, na que, ente otros asuntos, aprebáronse los Estatutos de l’AEA. Nel so articuláu pue lleese:
ARTÍCULU 2.- L’asociación tien les fines que vienen darréu: la promoción y espardimientu de la obra y de los escritores nacíos o residentes n’Asturies, asina como la defensa de los sos drechos y intereses.
ARTÍCULU 3.- Pal cumplimientu d’estos encamientos van realizase toles actividaes que contribuyan a les fines de l’asociación y, en concretu, les destinaes a la promoción y espardimientu de los escritores nacíos o residentes n’Asturies.
El númberu de socios, dende aquellos primeros once escritores, aumentó hasta los sesenta qu’anguañu formen parte de l’AEA y, ente ellos, hai escritores qu’usen pal so llabor lliterariu la llingua española y la llingua asturiana.
Dende la so creación, l’AEA entamó delles actividaes col patrociniu y la collaboración d’estremaes instituciones, como’l Gobiernu del Principáu d’Asturies, Cajastur, Ayuntamientu de Pravia, Ayuntamientu de Xixón, Café Apolo, Diario El Comercio, Fundación Foro Abierto, Club Prensa Asturiana del diariu La Nueva España y Editorial Anaya.
Ente los proyectos más destacaos de l’AEA destaca la organización añal de les Xornaes de Lliteratura, asina como la convocatoria añal de los Premios de la Crítica d’Asturies.
Les Xornaes de Lliteratura de l’AEA, protagonizaes polos propios escritores d’Asturies –cola participación mayoritaria de los que pertenecen a l’AEA- valen como llugar d’alcuentru, intercambiu d’esperiencies, diálogu lliterariu y debate d’aspectos llegales y técnicos qu’afecten a los escritores. Amás, cola sida d’ufiertar a tolos asistentes la posibilidá de conocer de primer mano a otros autores, asina como enseñar la nuesa lliteratura actual, tolos años s’invita a escritores d’otres comunidaes autónomes. Ente la relación d’autores invitaos tán los escritores Gustavo Martín Garzo, Javier Maqua, Fernando Marías, Ramón Buenaventura, Joan Margarit, Luis García Montero, Benjamín Prado, Félix Grande o Antonio Orejudo.
D’igual manera, l’AEA entamó otres actividaes, ente les que destacamos:
- Organización del I Alcuentru de Poesía con motivu de la celebración por parte de la UNESCO del Día Internacional de la Poesía.
- Organización del I Alcuentru Nacional de Lliteratura Infantil y Xuvenil, celebráu los díes 22, 23, 24 y 25 de mayu del 2002 n’Uviéu col títulu “Un nuevu sieglu pa nuevos llectores”.
- Collaboración permanente nel entamu d’actos de promoción y espardimientu de la lliteratura realizada por escritores asturianos col Foro Abierto de la Fundación Caja Rural y la Llibrería Cervantes.
- Collaboración nel añu 2002 col Colexu Oficial d’Apareyaores y Arquitectos Técnicos del Principáu d’Asturies pa la creación de los testos lliterarios del llibru El artista estuvo allí, gráficos y acuareles de Juan Martínez Rionda y testos de 84 autores d’Asturies.
- Coproducción de La voz de los poetas, obra de teatru representada por Teatro Pausa.
- Participación de l’AEA na Feria del Llibru d’Uviéu (ediciones del 2001 al 2005).
