LES LLUVIES DE CASTAMERE
Y LA LLITERATURA… EN PRAVIA
Por Dolfo Camilo Díaz
“Y La Música en Pravia” ye dichu popular que nació hai 119 años, cuéntase que cuando, en visita real pola inauguración de la llinia de fierrocarril Uviéu/Pravia/San Esteban de Bocamar, la banda música que tenía d´ambientar aquella visita de la Infanta Isabel de Borbón a San Esteban, siguía por un malentendíu en Pravia. Güei, seguimos remembrando aquella anécdota y podemos permitimos l´aquel d´ampliar lo que puea haber en Pravia, que ye muncho y guapo amás de la música, como, por exemplu, la lliteratura. Una finde más Pravia foi la matria de les lletres asturianes, la perfecta disculpa pa vese, sintise, reíse… Otra vuelta (y ya van venticuatro ediciones!) la capital del Baxu Nalón acoyó esti milagru qu´añu a añu propicia l´Asociación d´Escritores d´Asturies, comandáu con mano sabia y mayestra (que lo fue y lo ye) por esa fuercia de la natura (al par de marees, llunes y fuercia de la gravedá) que ye la esllumante Esther García López, perguapa per adientru y per afuera. Esta última quedada llevaba´l llamáu d´atención de “L´Oficiu d´Escribir, Editar y Lleer na Era Dixital” y axuntó a mediu centenar de participantes, reconocibles y talentosos, quintasencia los más d´ellos del bon cuntar. La menacia (y les oportunidaes) que xenera la Intelixencia Artificial foi ´l leit motiv que facilitó conferencies, meses reondes y, sobremanera, charres ente los participantes. Durante un par de díes, a la solombra del Rei Silo y d´esa fermosa Colexata, pudimos sintir y deprender de Gonzalo Llamedo, d´Esther Prieto, de Mirta Chamorro, de José Luis García Martín, de Montse Cuervo, d´Alma Hidalgo, de David Fueyo, de Miguel Rodríguez Monteavaro, de Paco Abril, d´Armando Murias, de Jorge Corrales, de Mercedes García Amado, de Roberto González Quevedo, de Cristobal Ruitiña, de Marta Mori, de Laura Marcos, de Priegue… O d´esa parexa radicalmente exemplar que son Ana y Quique. Nesi contestu, hasta ficieron, los nunca bien ponderaos artistes María López Barrio, Chus Arias y Raquel Páez, participativa performance de FLASHBACK, una obra teatru que toi presentando. Como siempre la convivencia xeneró esa sublime complicidá d´ente quienes se caricien nes sombrines que ´l flexu facilita, esa indesmayable osesión pola palabra. La Intelixencia Artificial de momento ye lo que queramos que puea ser y tontos sedríemos si nun supiéremos fixar con firmeza les condiciones del nuevu tableru de xueos que ya presenta si nun queremos que tolos creadores (hasta los de conteníos pa les IA) esapaezan consumíos pola so mesma creación. Asimov yá lo plantegó na so visionaria I ROBOT: “1- Un robot nun pue mancar a un ser humanu; 2-un robot nun pue dexar que l´humanu sufra y 3- Un robot tien de cumplir pa coles órdenes de los seres humanos siempre qu´este órdenes nun choquen a la contra de la primera llei” ¿Por qué nun repasar a los clásicos?
Dolfo Camilo Díaz
