La llocura y la muerte cébanse coles más débiles. Les muyeres sentímonos indefenses.
Qué triste noviembre, qué triste. Esti mes que yá de por sí ye escuru. La nueche llega darréu y el sol brilla débil y por menos hores . Pero amás la negrura asombrónos estos díes nos que, per un llau, difrutamos del branín de Samartín y, per otru, escurezse’l cielu ante la muerte. Qué triste noviembre. Nada que menos ocho muyeres asesinaes nuna selmana. Los ocho crímenes ocurrieron hores dempués de que miles de persones de toa España se manifestaren el sábadu contra la violencia sexista. Qué triste noviembre. Qué triste. Tamos aflixíos, ensin saber qué llocura ta medrando cada vez más nesta sociedá ensin valores, onde reina l’egoísmu y la violencia per uquier. Ta visto que nun ye cosa de lleis, dalgo más fondo ta fallando ente nosotros. Tamos anublaos y enzoquetaos, distraíos por otres cuestiones que nos apurre a toes hores la tele, aburríos de tantes xirigoncies polítiques amañaes polos que namás piensen nel poder y cuanto más poder más quieren. Y, per otru llau, vemos medrar cada vez más la violencia que se ceba coles más débiles. Vemos un día y otru cómo la muerte lleva a muyeres indefenses. Un día de llutu oficial y al día siguiente, dos muyeres asesinaes en Valencia, otra en Córdoba, otra en Vigo, otra n’Uviéu, otra en Tarragona, otra en Sevilla, otra en Madrí, otra en cualesquier requexu de la nuesa xeografía. Y van 48 no que va d’añu.
Quedámonos ensin pallabres, nun se sabe qué dicir. Manifestámonos, gritamos, o guardamos silenciu, llucimos llazos moraos, declárense díes de llutu oficial, pero ellos, los maltratadores, nun tienen coraes nin–yos lleguen estos mensaxes. Siguen col cuchiellu de la ira y de la llocura bien afiláu.
Nun ye solo cosa de lleis. La educación tien que xugar un papel mui importante. Paezme que nun ahí otru camín, pero hai que tomalo en serio. Tamos nun momentu d’alarma social. Tolos estamentos sociales han implicase. Tien qu’haber consensu políticu y consensu social. Ye urxente una solución, una solución que nun ye fácil. La llocura y la muerte andan per esti mundu de la mano. Qué triste noviembre, ¡qué triste!
