LLIBRERÍES EN CRISIS
El fechu de que zarre una llibrería nun suel ser noticia na prensa a nun ser que se trate de dalguna d’eses con munchos años d’antigüedá o que desempeñare, cuantayá, dalguna qu’otra función que nun fuere namás que la venta de llibros. Pongo por casu, l’aconceyamientu de persones que conspiraben contra’l gobiernu de turnu, la llectura secreta de llibros prohibíos, tertulies lliteraries de conocíos escritores o simplemente que les rexentare dalgún llibreru o llibrera d’esos colos que tolos aficionaos a la llectura nos presta conversar sobre lo humano y lo divino y de los que, por fortuna, tovía queda dalgún qu’otru n’Asturies.
En pocu tiempu zarraron n’Asturies trés llibreríes especializaes en temes asturianos: Alborá, en Xixón, y Trabe y Paraxuga, n’Uviéu. Fechu que sí recoyó la prensa, nun sé mui bien si llamentando’l llaceriosu momentu económicu, si amosando la poca aceptación de la llingua y cultura asturianes o, pensando meyor, emponderando la importancia que tuvieren eses trés “cases del llibru”.
Seya como fuere, apaeciera la noticia na prensa o non, nun dexa de ser una verdadera llástima que quedemos un poco güérfanos de cultura. Da lo mesmo la llibrería que seya pero si falamos d’Asturies da qué pensar que trés llibreríes especializaes en cultura asturiana desapaezan.
Puestos a especular sobre les causes del cierre tenemos que convenir que se deberá a problemes económicos, naide, por mui románticu que seya, pon un negociu pa perder dineru y trabayar abondo. Sí ye cierto que la industria cultural siempre anduvo per caminos difíciles y muncho más nos momentos de crisis. Eso siempre fue asina.
Quiciabes a este problema nun fairía falta da-y más vueltes si la mercancía fuere otra o mesmamente llibros pero, ¿qué llibros? Seguramente qu’otres llibreríes nun andarán mui sobraes de beneficios pero nunca faltará’l llector de betsellers qu’arregle la cuenta de resultaos.
Equí entraríemos yá n’otru análisis que nun dexa de tener les sos complicaciones pero que pal casu que nos ocupa llévanos directamente a facenos la pregunta de si la lliteratura asturiana o la cultura asturiana en xeneral tienen munchos o pocos llectores. Nun hai qu’olvidar qu’estes llibreríes tamién ufiertaben publicaciones d’otres materies, como la historia, l’antropoloxía, la etnografía, etc., y que tamién lo facíen en castellanu.
Centrándonos nos llibros en llingua asturiana, con una buena producción y una calidá contrastada, nun se nos escapa que’l mercáu vieno funcionando a lo llargo de los últimos años d’una forma irregular. Dalgún qu’otru análisis se fizo sobre la llectura de llibros n’asturianu y casi siempre se rellacionó más a los llectores con aspectos sociopolíticos que lliterarios. Falábase de militantes de la causa asturianista, de profesores de llingua, d’estudiantes, etc. D’unos años p’acá, colos avances de la normalización llingüística y una mayor calidá lliteraria, paecía abrise’l mercáu al común de les persones que compren llibros ensin nengún prexuiciu.
Sin embargu, paez ser, que les ventes nun ameyoraron muncho, d’ehí que nun falten voces crítiques dende los sectores del asturianismu políticu d’una falta de compromisu. Lo cierto ye que la sociedá asturiana magar qu’acepta como normal la creación lliteraria n’asturianu nun s’avera, como fuere d’esperar, a esta lliteratura.
Podríemos dicir, y asina lo señalen los llibreros, que sigue habiendo un mercáu bastante reducíu y dependiente de delles circunstancies como puen ser la celebración de la “Selmana de les Lletres” o les campañes de les editoriales que suelen proponer un par de tiraes al añu, baxando depués considerablemente les ventes.
Nun se pue dexar de llau tampoco, anque paeza esaxerao, l’abusu de la fotocopia en dalgunos ámbitos, como’l de la enseñanza, en vez de preocupase por tener una buena biblioteca y encamentar a los rapacinos la llectura en llingua asturiana, ensin querer meter nel mesmu sacu a tolos docentes, qu’escepciones háiles.
Si buscamos otres razones, rellacionaes coles nueves tecnoloxíes, nun paez que pal casu del asturianu puean tener muncha importancia, son poques les ufiertes de descargues y nules les versiones pal llibru ellectrónicu.
Quedaríamos un aspectu que nun dexa indiferentes a los llibreros, tratándose de llibros en cualquier llingua, como ye’l casu de los grandes centros comerciales. 
Sobre esta cuestión el sector siéntese claramente perxudicáu. Los escritores “d’ésitu”, tan felices y los llectores, dividíos, ente’l clásicu que disfruta de la llibrería tradicional, del contactu col llibreru qu’aconseya y se preocupa pol cliente y aquel qu’alcuentra la novedá ensin munchu esfuerzu de la que fai la compra pa la casa.
La lliteratura n’asturianu nun tien muncha presencia n’estes grandes superficies y menos visibilidá. Si dalgo quiten a les llibreríes bueno sería que polo menos promocionaren más esta lliteratura.
Al entamu del artículu señalaba que la prensa nun suel reflexar el cierre de llibreríes si nun son de muncha sonadía pero de les noticies que seguí pela rede pude sacar dalguna conclusión. En tolos países y nes grandes capitales vienen zarrando llibreríes importantes nestos últimos años. La crisis y los grandes centros comerciales tán nel puntu de mira d’esos llibreros que tuvieron qu’echar el pieslle.
Nun sé si sera comparable al casu de les llibreríes especializaes en llingua asturiana pero según eses mesmes noticies les llibreríes temátiques son les que más sufren estos males.
Malo ye pal llibreru, malo pal escritor pero malo tamién pal llector, que d’una manera o otra, acabará alcontrando’l llibru que busca pero robándo-y esi espaciu sagráu nel que-y presta atopase como en casa.
Ánxel Álvarez Llano es escritor.
