Alredor de la quintana: animales y otros bichos.
María Esther García López
Editorial Trabe.
Alredor de la Quintana ye una obra que recueyi dellos artículos publicaos en La Nueva España nos años 2009-2010, nel especial La Nueva quintana. Nestos rellatos, Esther García fai alcordanza de dellos animales que tán venceyaos a l’aldea. Rellatos toos ellos qu’espeyan una visión de los mesmos dende’l puntu de vista etnográficu y sentimental, onde se cuenten anéudotes, querencies y creencies, curaciones, rezares, vivencies y recuerdos al rodiu d’estos “collacios” que tán presentes y formen parte de la vida de la casería n’Asturies. Rellatos toos ellos qu’amuesen la sensibilidá d’esta autora valdesana narrando la memoria de la so infancia na tierra que la vio nacer.
Naz en La Degol.lada-Valdés-Asturies, onde pasa la so infancia y parte de la so mocedá. Ye Poeta y escritora destacada en llingua asturiana y castellana, tanto pol númberu de títulos publicaos como pola calidá de la so obra. Ye Llicenciada en Pedagoxía, Maestra, y Esperta en Filoloxía Asturiana y ye miembru correspondiente de l’Academia de la Llingua Asturiana. Tien publicaos dellos títulos de didáutica ya investigación histórica y etnográfica, y ye autora de llibros de testu pa la enseñanza del asturianu pa Educación Primaria y Secundaria. Collaboradora habitual de La Nueva España dende hai más d’una década, y collaboradora de numberoses revistes culturales y d’investigación. En narrativa y poesía tien publicaos dellos títulos como El tatuaxe (1998) el so primer llibru de narraciones pa neños. Destaca’l so llibru de poemes L.luribaga (2003), Zamparrampa, poemes pa nenos y nenas (2004), Tiempu d’Iviernu (2005), Faraguyas (haikus) (2007), el primer llibru de haikus escritu en llingua asturiana y que tuvo un gran ésitu nos foros lliterarios. Pisadas (2008), poemariu pol que se-y conceden el “Premiu Uviéu “ de poesía 2006, que convoca l’Ayuntamientu d’Uviéu. Nel xéneru narrativu destaca la so obra de relatos Historias de vida ya señas de muerte (2006) y A la gueta l’Amor (2010) publicáu por editorial Trabe. Parte de la so obra ta recoyida en distintes antoloxíes. Recibió’l Premiu de Relatos Curtios “Fernández Lema” na so edición de 2007, pol so relatu Performance y el Premiu “Xosé Álvarez” que convoca’l Centru Asturianu de Madrid pola so obra La Maestra, publicaos en respeutives antoloxíes dedicaes a estos premios. Recibe’l “Acesit León Delestal” pol relatu tituláu “La boda” (2010). Ye autora de dellos títulos de lliteratura infantil: Musical-landia,(2008) Menú de Versos (2009) y Deva y el Pitín (2010). Estos trés últimos publicaos en dos versiones, castellán y asturianu.
Nel añu 2007 recibe’l urogallo de bronce del Centru Asturianu de Madrid.
Dalgunos de los sos poemes fueron musicalizados pol compositor Ernesto Paredano, y editaos nel discu Alebrix.
