ediciones trabe, s. l. u.
¡Cómo te güelen los pies!, de María Luz Pontón, cuenta la historia de Gochón, el gochu más gochu y gayoleru del barriu.
Al señor Gochón nun-y podíes falar de la ducha o del agua, dáben-y válamos con solo pensar nel contautu del llíquidu elementu cola so piel curtío yá de tanta porquería. El fedor del so cuerpu tan puercu echa p’atr´ças a los vecinos y, pasín a pasu, va quedando ensin amigos; nin ttan siquier lu saluden los vecinos de la que xuben o baxen n’ascensor. Esta pequeña novelina infantil-xuvenil que cuenta les desgracies de Gochón por ser tan gochu ciárrase con una riestra de noticies curioses sobre asuntos d’hixene que-y valieron a l’autora pa componer la obra. Y termina’l llibru con un estudiu y una serie de conseyos pa padres y profesoráu sobre l’alquisición per parte de la reciella de los vezos hixénicos cotidianos, cómo-yos los facer más atractivos, cómo avezalos a cepillar los dientes, llavar les manes enantes de comer…
Guapamente ilustráu por Covadonga Valdés Moré, esti llibru, el númberu 36 de la colección Montesín d’Ediciones Trabe, tien valir mesmo pa la reciella (pue sirvir pa ente los 7 y los 10 años, aproximadamente) como pa les families y pal profesoráu.
