Madú Ediciones
Fragmento del prólogo por Roberto González Quevedo
(…)
Sorpréndenos agora Esther García López con una oubra orixinal por demás: el.la nun para quieta nin queda en moldes viechos, porque-l.ly presta esperimentar artísticamente. Con estos ochenta poemas pequenos, como los haikus xaponeses, l.logra muitu bien esa capacidá pa formar el sou universu estéticu: con poucas palabras, pero con muita fondura. Siguiendo’l círculu de las estaciones, quier Esther chegar al corazón de los l.lectores deixando estas estampas chenas de significáu ya de guapura.
Presta especialmente esti l.libru porque Esther l.logra xunir la naturaleza ya la sensibilidá pa colos animales con un ritmu ya una cadencia especiales. Suenan en muitas páxinas estos haikus como música: paecen pentagramas nos que l’autora va reflexando en miniatura rel.lumos ya imáxenes. Pero nun son rel.lumos namás, sinón que detrás hai una especial sensibilidá ya comprensión del mundu que ta alredor de nós.
La idea de dir fotografiando poéticamente con haikus las estaciones del anu danos amás la visión cíclica de la vida: nada apara, tou se mueve, enxamás queda quieta la realidá de las cousas: las abeas, los estal.lones, la l.luz, tou sigue la l.lei guapísima de la vida (…)
‘Faraguya’ yía una palabra que tien n’asturianu unos cuantos siginificaos ya matices. ‘Faraguya’ yía una migayina, un cachín de pan. Tamién yía ‘faraguya’ una cousa pequenina, ruina, delgadina. Hasta de la xente que nun tien importancia se diz que yía ‘faraguya’. Por eso en del.los casos faraguyas son bobadas, tonterías, cousas inútiles. Pero, ¡ai!, ‘faraguya’ tien n’asturianu un matiz tamién sublime: aqul.la cousa pequena pero que chena’l corazón, aquel.la cousa que paez sin importancia pero qu’en realidá yía la que fai posible la existencia ya la rueda de la vida.
Estas Faraguyas d’Esther son faraguyas porque son, como haikus, versinos ya estrofinas pequenas. Son faraguyas porque paez que nun son importantes. Pero non, en realidá tienen muita importancia: por estos poeminos pasa la fondura de la vida contada a los llectores con un son tan melancólicu como al.legre. Son dulces ya tienen un pouquín de cousa aceda, como la vida mesma.
