José Ángel Gayol (Mieres del Camín, 1977) ye poeta (Los poemes del oriental, 2013; El llibru de les coses misterioses, 2013; Los suaños y los díes, 2014; Una selmana y otros díes, 2015), narrador (Argonautes, 2007; En primera persona, 2019), creador de testos teatrales (Ensin noticies del fin del mundu, 2011) y ensayista de fondura (Vértigu, 2016; Exercicios d’asturianu, 2016).
Tien ganao dellos de los premios de más prestixu de les lletres asturianes: Asturias Joven de Poesía (2015) y de Textos Teatrales (2010); «Elvira Castañón» (2011), «Fernán-Coronas» (2011) y «Xuan María Acebal» (2012) de Poesía, amás del «Máximo Fuertes Acevedo» d’Ensayu en dos ocasiones (2015 y 2019). El silenciu invisible confírmalu como la voz más interesante y personal de les nueses lletres pola fondura intelectual y la capacidá d’análisis, que lu lleven a afilvanar idees y afirmaciones polítiques, filosófiques o sociales d’altor.
El silenciu invisible ye un llibru singular, a medio camín ente la obra d’arte y la de pensamientu. Con un planteamientu bien orixinal y plásticu, al empar cenciellu y d’altor, l’autor va guiando a quien llee páxina tres páxina per ún de los grandes debates de la humanidá: cómo’l ruíu nos torga l’entendimientu y la comprensión.
El conocimientu sociopolíticu que la ciudadanía tien o la información social que recibe ye un discursu, una ficción que los poderes económicos y políticos-y ponen delantre como una Ventana comunicacional qu’ellos manexen y mueven d’equí p’allá p’abrir o cerrar la visión según intereses. Esta ventana comunicacional asemeya un cuadru y la pintura invita al silenciu, ye poesía muda, la palabra del silenciu. ¿Cómo pue, entós, ayudanos la pintura a conocer esa realidá? D’eso trata esti llibru, de cómo nel silenciu de la pintura vamos poder descubrir l’otru silenciu necesariu pal entendimientu y la comprensión de la realidá –la Verdá– esterior.
