Recetes con cuentu ye un llibru que solo Milio’l del Nido ye quien a escribir. Nél aúna con soltura y sentíu del humor l’anécdota más bien contada y la receta culinaria. Dos son les maneres d’averase a él: como volume de cuentos que bebe de la tradición oral y como recetariu de cocina; y cualaquiera de les dos va dexar bon sabor de boca a quien lu llea.
Milio’l del Nido (Milio Rodríguez López, Uviéu 1944) ye contador de cuentos, escritor, folclorista, activista cultural y, d’hai unos años p’acá, presentador de la TPA, casa na que selmanalmente va esgranando les recetes qu’equí se recueyen, nel programa que tien por nome’l títulu d’esti llibru.
