Esther García López tuvo en munchos sitios, en cuasi tolos que tienen que ver cola cultura y la llingua asturianes. Un bon testigu d’esta actividá d’Esther alcuéntrase na so obra, dende los llibros d’usu pedagóxicu pa investigar en téuniques educatives hasta los llibros de testu de l.lingua asturiana y los artículos de prensa nos que vien dando la so opinión, atenta y certera, de la realidá que tenemos alredor de nós. Hai tán, por exemplu, les sos interesantísimes investigaciones etnográfiques en Cultures, Revista Asturiana de Cultura y n’otres publicaciones y llibros.
Pero la vitalidá d’Esther García López como escritora garró fuerza en 2003, cuando espublizó aquel llibru col guapu títulu de L.luribaga. “L.luribaga”, que ye una palabra que se refier al frutu del l.loréu, ye una obra con versos mui bien fechos na nuesa l.lingua. Aquel poemariu ye la punta d’un camín que nun dexó d’espurrise hasta llegar a esta obra cabera, la que xune, col finu filu del Yo taba ellí, una serie de rellatos mui aquello.
El rellatu primeru titúlase “You taba al.lí, en Las Güelgas” y ye la hestoria d’una boda. Esther ta presente nuna boda y descríbenos perfeutamente esi ambiente especial, de la xente amirando, cavilando y criticando, la concreción nel ritual de la realidá social que se manifiesta nos detalles más pequeños. Mécense asina dos momentos decisivos de la existencia, siempres perbién matizaos lliterariamente por Esther.
Tamién tuvo nuna queimada y fainos alcordanza lliteraria de cómo hubiera una enllaz máxicu mientres ella lleía los testos del esconxuru. Ellí taben esos personaxes de la maxa, del poder que nun vemos. Anque ella sintió que taben, tamién, los otros: “Lo que nun ocupen sitiu na fiesta pero tán ente nós”.
Estos rellatos d’Esther son palpitaciones del corazón, imáxenes brillantes que quedaren na memoria. Y qu’enseñen les esquines d’una realidá qu’intuimos, como aquella de la estrena de la primavera y la so asociación cola ropa que valía pa inicianos nos cambios que revitalicen la nuesa existencia.
Esther García López ye una bona aficionada a la vida de los animales, al secretu qu’escuenden los animalinos que nos acompañen nel pasu de la vida. Un guapu rellatu fálanos de cuando ella taba ellí, en chigre, y vio cómo rompía’l gaiteiru la gaita, porque la gaita ye pa tocala. Y si non la toques apodérense d’ella esos animales tan poco queríos que son les arañes coles sos teles. Y viendo la gaita rota, el gaiteru salió del chigre, atritayáu. La gaita ye pa tocala. Y Esther atestigó aquel momentu con una mui guapa fotografía lliteraria.
Y tamién taba Esther una nueche en L.luarca. Una nueche de fiesta: tenía que ser, nun hai dulda, per San Timoteo. Y, por supuestu, Esther taba en más folixes. Y taba ellí dando vida a un chambrón, esi brusón que se convirtió en traxe típicu inevitable de la fiesta de L.luarca. Cuenta un chambrón la sua hestoria personal nun día d’esa celebración emblemática. Un oxetu tan humilde como’l chambrón ye testigu de la vida de la xente, de les hestories de caún y de la vida social en xeneral. De cómo entama la folixa y de cómo termina. De cómo relluma un día y una nueche y depués espera a que la maxa del ciclu anual lu faiga revivir al añu viniente.
Hai a lo llargo d’esti llibru d’Esther un volver de contino a lo que queda depués de la fiesta, onde se replanteen les identidaes y tamién los destinos. Mui bien d’estes narraciones salen del silenciu depués del festexu, cuando los interrogantes faense xigantes y cuando los vaivenes de los cabezudos dexen la nuesa alma pensatible.
Esther tamién tuvo, lóxicamente, nel so esame d’ingresu. Y n’otros díes qu’aliten na memoria coleutiva de toos nosotros. Siempre nes obres d’Esther apaez la cuestión del misteriu de la vida y de la muerte. Y ella sabe sacar siempre a esos momentos nos que tuvo un sabor especial. Y agora qu’hai una riestra mui importante d’obres lliteraries d’esta autora, convien faer esti balance. Lo interesante que ye’l ciclu evolutivu de la obra lliteraria d’Esther. Destacar cómo va cubriendo munchos campos lliterarios con maestría y bon tientu. Y soliñar cómo va anovando caminos y nun queda quieta nuna llinia namás. Siempre con nueves perspeutives.
