Esti xueves pasáu, 10 d’avientu, a les 17:30 hores, axuntó de forma telemática’l xuráu del Premiu de la Crítica de l’Asociación d’Escritores d’Asturies (AEA) na categoría de poesía n’asturianu, conformáu polos escritores Lourdes Álvarez, Marta López Fernández, Xuan Xosé Sánchez Vicente ya Inaciu Galán, ayalgueru de l’AEA, como secretariu con voz pero ensin votu.
Tres destacar el contentu pola bona participación y sobre manera pola calidá de les seis obres presentaes como candidates al premiu, lo que pal xuráu fala del bon momentu del panorama poéticu n’asturianu, aldericóse sobre les mesmes, tomándose por unanimidá’l determín de declara ganador del premiu al llibru Esti llugar qu’agora ye nuesu. Poemariu neanderthal, d’Aida Escudero, asoleyáu por Ediciones Trabe.
El xuráu destacó de la obra, conformada por ventisiete poemes, el so llirismu, que percuerre tol llibru, asina como la so calidá, la novedá temática de los poemes y el so frescor. La orixinalidá del poemariu, nel peculiar contestu de la prehistoria, foi tamién elementu a destacar polos miembros del xuráu.
El poemariu fuere ganador en 2017 del prestixosu Premiu Fernán Coronas de poesía, convocáu pola Sociedá Popular La Regalina de Cadavéu. Aida Escudero (Uviéu, 1985) foi tamién ganadora en 2018 del Premiu Asturies Xoven de poesía col poemariu Familia con autorretratu al fondu, y ye habitual de revistes como Formientu, Larius o Lliteratura.
