Dolfo Camilo Díaz pasa a la historia por ser el primer ganador del Premiu Pachín de Melás de testos teatrales qu’entama’l Gobiernu al traviés de la Viceconseyería de Cultura, Política Llingüística y Deporte. El de Caborana presentó la obra ‘Flahsback’, que va representase como parte de la recompensa del gallardón.
El “arte col que remana’l xéneru de la comedia y l’habilidá pa integrar númberos musicales nuna obra de tonu ácidu e irreverente que trata temes de la historia asturiana recién” foi lo que valoró’l xuráu del Pachín de Melás pa decidise pola obra de Díaz ente les 9 presentaes al concursu na so primer edición. Amás, rescampla, “failo presentando una trama mui ellaborada qu’avanza de manera áxil y dinámica al traviés de personaxes mui auténticos que dexen patente el dominiu del rexistru coloquial del asturianu”.
Antón García, direutor xeneral d’Aición Cultural y Normalización Llingüística, actuó como presidente de dichu xuráu, que tuvo conformáu pol escritor y traductor Henrique Facuriella; l’actriz y direutora de la compañía É Vero Teatro, Verónica Gutiérrez González; y la tamién actriz y profesora de la scuela Superior d’Arte Dramáticu del Principáu d’Asturies (ESAD), Begoña Quirós. Laura Marcos, filóloga adscrita al Serviciu de Planificación Llingüística, fixo’l llabor de secretaria.
El Pachín de Melás de testos teatrales, que lleva’l nome pol que se conoció al dramaturgu xixonés Emilio Robles Muñiz (1877-1937), fundador de la corriente costumista o teatru asturianu de la naturaleza, ta dotáu con 6.000 euros y contempla, amás, la coedición del testu y la coproducción de la obra con una compañía profesional, aparte del compromisu d’incluyila ente les actividaes culturales promovíes por Cultura, Política Llingüística y Deporte. El so oxetivu, amás de reconocer el llabor de Pachín de Melás, ye promover la creación y incentivar la puesta n’escena d’obres de teatru n’asturianu.
Díaz ye la primer persona en llevalu y failo con un testu nel que llevaba trabayando dellos años. Nacíu en Caborana nel 1963, ye ún de los escritores más renocíos de les nueses lletres, como amuesen los sos cuatro Premiu Xosefa Xovellanos de novela (‘Añada pa un güeyu muertu’ nel 1985, ‘Diariu de viaxe’ nel 1995, ‘Imago’ nel 2006 ex aequo con ‘El pisu d’enriba’ de Xulio Arbesú y ‘Advenimientu’ nel 2008) el IX Premiu María Josefa Canellada de lliteratura infantil, correspondiente al añu 2016, pol ‘La mar’ o los dos Premios Montesín d´Editorial TRABE por KHAOS (2008) y MEMORIAL DEL MONSTRU (2011) y llevó a escena dende´l 1981 una ventena d’obres de teatru (representaes poles más señalaes compañíes del país: Margen, Higienico Papel, NUn Tris, Tragaluz, Casona…): ente más otres la mítica PAÍS o, más recien, MUYERES INESPERAES, amás de ser pioneru del radioteatru n´Asturies col recordáu EL GRAN TEATRU DEL MUNDU (RTPA 2013), onde versionó pa la radio pieces como LA REXENTA o LA GUERRA DE LOS MUNDOS
El 10 de payares/noviembre presentará nel teatru de Pravia, a les 20h, nel contestu de les Xornaes Lliteraries dedicaes al Teatru qu´entama l´Asociación d´Escritores Asturianos, la obra LA ENTREVISTA pieza-homenaxe al teatru de Harold Pynter, que resume les esencies del autor corveranu/ayerán: intensidá, ácedu humor y compromisu social…
